S-genitiv
S-genitiv har alltid vore i bruk i nynorsk, men i mindre omfang enn i bokmål. Her finn du råd om korleis du kan bruka denne forma.
Når kan vi bruka s-genitiv på nynorsk?
Ved særnamn er s-genitiv vanleg:
Noregs land, Noregs Bank, Vinjes skrifter, Ibsens skodespel
Ved samnamn i ubunden form eintal og fleirtal er det òg vanleg å nytte s-genitiv: lang dags ferd mot natt, i manns minne
I uttrykk for tid og mål: eit års arbeid, tre kilometers veg, ei vekes tid
I namn på offentlege institusjonar er s-genitiven komen i bruk ved hankjønns- og inkjekjønnsord i bunden form eintal:
Statens vegvesen
Statsministerens kontor
Forsvarets forskingsinstitutt
Stortingets ombodsmann for forvaltninga
I staden for s-genitiv: skriv om!
Vi bruker ikkje så ofte genitiv når vi snakkar. I staden for å tenkja kva du ville ha skrive (på bokmål), kan det vera lurt å tenkja på kva du ville ha sagt.
Då er det ofte vanleg å skriva om ved hjelp av
- preposisjonar
- samansette ord
- sin, si, sitt, sine
- leddsetningar
a) Omskriving med preposisjonar
bokmål | nynorsk |
---|---|
bygdas folk |
folket i bygda |
rådmannens innstilling |
innstillinga frå rådmannen (betre enn innstillinga til rådmannen, som kan mistydast) |
kommunens vedtak |
vedtaket i/til kommunen |
barnehagens størrelse |
storleiken på/til barnehagen |
ungdommenes alder |
alderen på ungdommane |
skolens nettside |
nettsida til skulen/skolen |
Spanias hovedstad |
hovudstaden i Spania |
b) Omskriving med samansette ord
bokmål | nynorsk |
---|---|
bygdas folk |
bygdefolket |
Stortingets vedtak |
stortingsvedtaket |
FNs erklæring om menneskerettighetene |
FN-fråsegna om menneskerettane |
skolens bibliotek |
skulebiblioteket |
c) Omskriving med sin, si, sitt og sine
Der det er tale om eigedomstilhøve, kan du gjerne bruka omskriving med sin, si, sitt og sine. Konstruksjonar med sin er særleg utbreidde i talemålet langs kysten, men er også vanlege i skriftspråket:
bokmål | nynorsk |
---|---|
bondens traktor |
bonden sin traktor |
naboens hytte |
naboen si hytte |
Elis hus |
Eli sitt hus |
Øysteins sykkel |
Øystein sin sykkel |
ordførerens forslag |
ordføraren sitt framlegg |
skolens penger |
skulen sine pengar |
I samanhengar der eigedomstilhøvet ikkje er like tydeleg, bør du vurdera andre løysingar:
bokmål | nynorsk |
---|---|
russestyrets leder |
leiaren for/i russestyret |
bygningenes vaskeareal |
vaskearealet i bygningane |
d) Omskriving med leddsetning
bokmål | nynorsk |
---|---|
Utvalgets oppgave består i å |
Oppgåva (som) utvalet har fått, går ut på å / Utvalet har fått i oppgåve å |
en skisse som viser etatens oppbygning |
ei skisse som viser korleis etaten er oppbygd |
Det er gitt ulike signaler om kontorets framtidige plassering |
Det er gjeve ulike signal om kvar kontoret skal plasserast/vera/liggja |
De diskuterte … | Dei diskuterte … |
---|---|
… beløpets størrelse |
… kor stort beløpet er / var / skulle vera |
... etatens oppbygning |
… korleis etaten er oppbygd |
… kontorets framtidige plassering |
… kvar kontoret skal plasserast/vera/liggja |
… bilens tilstand |
… den tilstanden bilen var i |
Fann du det du leita etter?
Trykk på Ja eller Nei og skriv ei tilbakemelding med ris, ros eller begge delar. Vi svarar ikkje på tilbakemeldingane, men vi les dei aller fleste nøye.