Mållova
Mållova (lov om målbruk i offentleg teneste) regulerer bruken av bokmål og nynorsk i staten. Her finn du viktige rettar for deg og viktige plikter for staten.
- Du skal få svar frå eit statsorgan i den målforma du sjølv har nytta i brevet til statsorganet.
- Skjema, til dømes sjølvmelding og vigselattest, skal vere tilgjengelege i begge målformer. Det same gjeld det lova kallar «løyve og faste formular», som til dømes pass og førarkort. I somme tilfelle finst begge målformene i eitt og same dokument, som i passet, medan det i andre tilfelle blir tilbode både bokmåls- og nynorskversjon, som fødselsattest.
- Kommunar har rett til å velje i kva målform dei vil ha skriv frå staten. Vedtaket blir gjort av kommunestyret og kallast målvedtak. Målvedtaket i kvar kommune dannar òg utgangspunktet for fleirtalsmålforma i eit område.
- Tilfang med særleg tilknyting til eit geografisk avgrensa område, til dømes ein annonse som gjeld nokre få kommunar, skal vere i fleirtalsmålforma for området – det vil seie den målforma dei fleste av kommunane i området har valt.
- Sentrale statsorgan, dvs. statsorgan som dekkjer landet som tenestekrins, er språkleg nøytrale. Dei skal veksle mellom nynorsk og bokmål. På nettsider, i stillingsannonsar og i rapportar og anna skriftleg tilfang skal ingen av målformene vere representerte med mindre enn 25 % hjå sentrale statsorgan.
- Når lokale og regionale statsorgan informerer på nettsider, i stillingsannonsar, rapportar og anna skriftleg tilfang, skal dei bruke tenestemålet sitt. Tenestemålet blir fastsett på bakgrunn av fleirtalsmålforma i området.
Språkrådet fører tilsyn med målbruken i sentrale statsorgan. Me veit at mange av språkbrukarane i ein del tilfelle ikkje får oppfylt rettane sine. I dei aller fleste tilfelle er det nynorsken som er underrepresentert og ikkje blir bruka slik han skal.
Målvedtak i kommunane
Kommunane har rett til å velje i kva målform dei vil ha skriv frå staten. Vedtaket blir gjort av kommunestyret og kallast målvedtak.
På Lovdata ligg ei oversikt over kommunanes målvedtak etter forskrift om målvedtak i kommunar og fylkeskommunar.
Fann du det du leita etter?
Trykk på Ja eller Nei og skriv ei tilbakemelding med ris, ros eller begge delar. Vi svarar ikkje på tilbakemeldingane, men vi les dei aller fleste nøye.